Bæjarráð Vestmannaeyja tók fyrir á síðasta fundi sínum erindi frá Þresti B. Johnsen þar sem hann krafðist skaðabóta vegna framkvæmda við gatnagerð austan við Alþýðuhús.

Þröstur telur að framkvæmdirnar hafi valdið rekstrarskaða. Í erindi sínu til bæjarráðs segir hann að aðgengi að húsinu hafi verið lokað beggja vegna í um tvo mánuði í sumar, haust og fram á vetur, án þess að hann hafi verið upplýstur fyrirfram.

Hann óskaði eftir að sveitarfélagið greiddi skaðabætur sem hann hefur reiknað út og að upphæðin yrði skuldajöfnuð upp í fasteignagjöld.

Bæjarráð taldi hins vegar ekki forsendur til að verða við erindinu. Í bókun ráðsins kemur fram að gatnagerð sé lögbundið verkefni sveitarfélaga og að slíkar framkvæmdir leiði ekki einar og sér til bótaskyldu. Kröfu um skaðabætur og skuldajöfnun var því hafnað.