Ísfélagið lauk veiðum á norsk-íslenskri síld um helgina. Skip félagsins eru nú komin á veiðar á íslenskri sumargotssíld vestan við land og er Heimaey væntanleg til Vestmannaeyja á fimmtudag með fyrsta farminn af þeim veiðum.
Ísfélagið hóf veiðar á norsk-íslenskri síld um miðjan september og lauk þeim um síðustu helgi þegar Sigurður landaði á Þórshöfn. Skip félagsins veiddu tæp 18.000 tonn af norsk-íslenskri síld á tímabilinu. Auk þess veiddu þau um 5.000 tonn af íslenskri síld sem var að töluverðu leyti blönduð þeirri norsk-íslensku.
„Við þurftum að hafa meira fyrir þessum veiðum í haust miðað við fyrri ár. Eitthvað var síldin dreifðari og svo var veðrið ekkert alltaf í liði með okkur,“ segir Eyþór Harðarson, útgerðarstjóri Ísfélagsins, í svari við fyrirspurn Eyjafrétta.
Norsk-íslenska síldin var unnin á Þórshöfn eins og áður.
Sigurður hélt frá Vestmannaeyjum til síldveiða í morgun. Heimaey er væntanleg til Eyja á morgun, fimmtudag með fyrsta farminn af veiðunum vestan við land.
Ísfélagið á eftir að veiða um 7.000 tonn af íslenskri sumargotssíld og vonast til að ljúka veiðunum fyrir jól. Síldin verður unnin í Vestmannaeyjum og bolfiskvinnsla tekur við á Þórshöfn.