Á fund Bæjarráðs í dag kom Guðbjartur Ellert Jónsson, framkvæmdastjóri Vestmannaeyjaferjunnar Herjólfs ohf. og greindi frá stöðu undirbúnings félagsins á yffirtöku á rekstri Herjólfs og nýrrar Vestmannaeyjaferju.

Hann telur að félagið sé undir það búið að taka yfir rekstur Herjólfs þann 30. mars. Búið er að ganga frá ráðningarsamningum nær allra áhafna ferjunnar (skipstjóra, vélstjóra, stýrmanna og háseta), en enn er verið að vinna að vaktaplani fyrir afgreiðslufólk félagsins og þegar það liggur fyrir verða ráðningarsamningar kláraðir. Einnig kom fram í máli Guðbjarts Ellerts að búast megi við tæknilegum hnökrum einhverja daga í tengslum við yfirfærslu rekstursins til félagsins.

Enn er eftir að ljúka samningum um ákveðin aukaverk
Bæjarstjóri fór yfir stöðuna á nýrri Vestmannaeyjaferju, fund með vegamálastjóra og dýpkun hafnarinnar. Á fundi með vegamálastjóra kom fram að enn er ákveðnum atriðium ólokið varðandi framkvæmdir á skipinu og enn er eftir að ljúka samningum um ákveðin aukaverk. Upplýsingar um afhendingu ferjunnar munu skýrast frekar síðar í þessari viku. Gefið hefur verið út að skipið verði tilbúið 29. mars nk. Dýpkun Landeyjarhafnar gengur hægar en vonir stóðu til. Bæjarstjóri hefur komið á framfæri að afkastageta verktakans við dýpkunina sé óásættanleg. Bæjarstjóri upplýsti um að von er á vegamálastjóra á fund bæjarstjórnar Vestmannaeyja í næstu viku.

Óásættanlegt
Bæjarráð lýsir óánægju með ekki sé enn búið að opna Landeyjarhöfn, þrátt fyrir að margir dagar hafi gefist til dýpkunar á undanförnum vikum. Afkastageta verktakans við dýpkun er með öllu óásættanleg og því miður sannast nú þær áhyggjur sem bæjarstjórn Vestmannaeyja hafði margbent á varðandi afkastagetuna.