Eyjagöng ehf. hafa gert samning við Ræktunarsamband Flóa og Skeiða um framkvæmd kjarnaborana sem liður í áframhaldandi könnun á fýsileika fastrar vegtengingar milli lands og Vestmannaeyja. Þetta kemur fram í tilkynningu frá félaginu.

Markmið rannsóknanna er að afla ítarlegra upplýsinga um jarðfræðilegar aðstæður á fyrirhugaðri leið. Boranirnar munu fara fram á tveimur stöðum, annars vegar á Eiðinu á Heimaey og hins vegar í Landeyjasandi við bæinn Kross.

Undirbúningur hefst í byrjun apríl og er áætlað að boranir hefjist í lok mánaðarins. Gert er ráð fyrir að þessum áfanga rannsóknarinnar ljúki í byrjun júlí. Niðurstöðurnar munu nýtast sem lykilgögn við frekara mat á tæknilegum og framkvæmdalegum möguleikum verkefnisins.

„Við leggjum ríka áherslu á að allar ákvarðanir um framtíðar vegtengingu séu byggðar á traustum vísindalegum grunni. Samstarfið við Ræktunarsamband Flóa og Skeiða tryggir okkur mikla sérþekkingu við þessa mikilvægu gagnaöflun,” segir Haraldur Pálsson framkvæmdastjóri Eyjaganga og bætir við að þó að langtímamarkmiðið sé skýrt, þá sé þetta rannsóknarstig lykillinn að því að hægt sé að meta alla möguleika af fagmennsku og nákvæmni.