Góð dagskrá var á vegum Landakirkju um páskana, þar sem íbúar komu saman til helgihalds og samveru.

Föstudaginn langa var lesið úr Passíusálmum, þar sem fólk kom saman í kyrrð og íhugun.

Á páskadagsmorgun safnaðist hópur fólks saman á Stórhöfða til að fylgjast með sólarupprás. Alls mættu 15 manns klukkan 06:27 og nutu stundarinnar þegar sólin reis á þessum hátíðisdegi. Við helgistundina las Viðar prestur úr ritningunni og að því loknu sögðu allir í kór: „Kristur er sannarlega upprisinn“, í samhljómi við boðskap páskahátíðarinnar. Messa var svo haldin í Landakirkju klukkan átta um morguninn og að henni lokinni var boðið upp á morgunverð í safnaðarheimilinu þar sem kirkjugestir gátu notið samveru í notalegu andrúmslofti.

Myndasyrpa frá Óskari Pétri fylgir fréttinni.