Landeyjahöfn opnaði í gær og siglir Herjólfur nú sjö ferðir á dag til hafnarinnar. Strætó er með tvær rútuferðir á dag til Landeyjahafnar en hvorug ferðir samræmist siglingartíma Herjólfs og verður það þannig þar til sumaráætlun Strætó tekur gildi.

Breytingin á tímatöflu Herjólfs kom leiðakerfi Strætó í opna skjöldu sagði Guðmundur Heiðar Helgason upplýsingafulltrúi Strætó þegar Eyjafréttir höfðu samband og sagði hann að þeir hefðu fengið afar lítinn fyrirvara.

Breytist í lok maí

„Það er flókið mál að breyta leiðakerfinu og margt sem þarf að huga að.  Þessi breyting hjá Herjólfi hefur áhrif á allt leiðakerfi Strætó á Suðurlandi. Við erum að vinna hörðum höndum með SASS að setja saman nýjar áætlanir og þær munu ekki breytast fyrr en 26. maí, þegar sumaráætlun Strætó tekur gildi,“ sagði Guðmundur Heiðar.