Bakkar með sviðum og meðlæti komið á borð, spenna og eftirvænting áþreifanleg. Svo var merki gefið og menn tóku til matar síns af krafti.

Árleg sviðaveisla hafin í fiskimjölsverksmiðju Vinnslustöðvarinnar sem svo heitir formlega og hátíðlega en kallast einfaldlega „bræðslan“ eða „gúanóið“ manna á meðal.

Upphaflega var það víst fiskúrgangurinn sem kallaðist gúanó, hráefnið í mjöl eða lýsi. Spekingar telja að orðið hafi borist hingað úr norsku eða dönsku en sé ættað úr máli indíána í Perú!

Svo yfirfærðist hugtakið á sjálfa starfsemina, fiskimjölsverksmiðjurnar. Það er allt önnur saga og hana bar aldrei á góma í sviðaveislunni í gúanóinu í Eyjum. Allt aðrar sögur, meira krassandi og mun nærtækari flugu þar fram og til baka. Fæstar þeirra prenthæfar og engar tengdar indíánum í fjarlægum heimshornum.

Sviðaveislan á sér áratuga langa sögu í bræðslunni, Óskar Valtýsson man tímanna tvenna á þessum vinnustað frá því fyrir gos. Hann segir að þá þegar hafi þessi hefð verið komin á.

Seinni tíma viðbót er golfmót gúanósins. Það var háð í blíðskaparveðri á golfvellinum og verðlaun afhent í veislunni um kvöldið. Eitthvað annað en í fyrra þegar varla var hundi út sigandi veisludaginn en menn kláruðu samt hringinn.

Fyrirkomulagið er þannig að saman spila tveir og tveir, annar reyndur en hinn óreyndur. Sigurvegarar voru Andrés og Hlynur á 32 höggum, sem er þremur höggunum undir pari. Það er  sviðaveislumet og skráð á söguspjöld.

Upphaflega suðu gúanókarlar sviðin heima, komu með í vinnuna ásamt drykkjarföngum og lögðu í púkk. Svo hófst veisla.

Næsta stig í þróuninni var að starfsmennirnir suðu sviðin á vinnustaðnum og borðuðu svo. Siggi Friðbjörns, fyrrverandi verksmiðjustjóri, útvegaði nokkrum sinnum alvöru sauðahausa úr kaupfélagi af Austurlandi og þeir fóru afar vel í Eyjakarlana.

Kaupfélagið kunni hins vegar ekki að rukka fyrir sviðapokana og fór á hausinn. Það segja að minnsta kosti áreiðanlegir heimildarmenn í hópi gúanókarla og þá er það rétt. Þeir ljúga engu. Aldrei.

Eitthvað dofnaði yfir sviðaveislumálum í bræðslunni um tíma. Það líkaði ekki framkvæmdastjóra Vinnslustöðvarinnar enda er Binni einn sannkristnasti sviðaunnandi sem þekkist í Vestmannaeyjum. Því kynnist Unnar Hólm Ólafsson vel þegar hann var ráðinn til  fiskimjölsverksmiðjunnar árið 2015.

„Starfið var kynnt mér og ég kallaður í viðtal hjá framkvæmdastjóra VSV. Eins og nærri má geta fór ég þveginn, strokinn og uppáklæddur á vettvang og bjó mig undir rökræður um starfsemi verksmiðjunnar, kaup og kjör. Binni byrjaði hins vegar á því að leggja þunga áherslu á að nauðsynlegt væri að hressa upp á sviðaveislurnar og sjá til þess að myndarlega yrði að þeim staðið á allan hátt. Honum voru sviðin langefst í huga.

Ég hef reynt að standa mig í stykkinu í verksmiðjunni og vanda mig sérstaklega við haustfagnaðinn og sviðin. Binni mætir alltaf og dvelur lengi við kjammafötin. Það hlýtur að þýða að þetta sé allt í góðu lagi hjá okkur.“

Myndaveisla: Golf og sviðaát!