Inda Marý Kristjánsdóttir nemandi í 10. bekk í Grunnskóla Vestmannaeyja, GRV vann til verðlauna í ljóðasamkeppni grunnskólanema, Ljóðaflóði, sem Miðstöð menntunar og skólaþjónustu stendur árlega fyrir í tilefni af degi íslenskrar tungu.

„Við í GRV erum ákaflega stolt af Indu Marý og hlökkum til að sjá fleiri ljóð frá henni í framtíðnni, þess má geta að hún hlaut einnig viðurkenningu í ljóðasamkeppni Mjólkursamsölunnar í fyrra,“ segir á Fésbókarsíðu,“ skólans.

Í ummælum frá MMS segir: Okkur bárust fimm ljóð frá Indu sem voru öll áhrifamikil og sterk, greinilega upprennandi ljóðskáld!

Ljóðið

Hér á myndinni afhendir Einar Gunnarsson skólastjóri Indu Marý viðurkenningaskjal og bókaverðlaun frá MMS. Ljóðið og ummæli dómnefndar má sjá hér fyrir neðan.

Þú grætur ekki eins og ég

þegar tunglið lýsir upp næturhimininn

og sólin er löngu búin að fela sig

geri ég mig tilbúna í háttinn

og breiði sængina mína yfir mig

um leið skríða minningarnar um okkur út um augun á mér

og leka niður kinnar mínar

ég minni mig þá á að þú grætur ekki yfir þeim,

þótt að þetta séu líka minningarnar þínar

Umsögn dómnefndar:

Ljóð eftir Indu Marý Kristjánsdóttur

Tilfinningaþrungi og einlægni koma vel fram í þessu fallega ljóði ásamt áhrifamiklu myndmáli.