„Ég er bæði hissa á aðferðarfræðinni og látunum við að klára málið. Ég hef bent á það áður og það hefur verið bent á það með gögnum úr mörgum áttum hvaða skekkjur eru í frumvarpinu. Hvernig því var svo breytt á milli 1. og 2. umræðu var á kostnað Suðurkjördæmis og Norðausturkjördæmis. Hvernig þingmenn stjórnarflokkana létu í þessum kjördæmum, létu það yfir sig ganga er óskiljanlegt. Það hefur engan veginn verið komið til móts við áhyggjur sumra þeirra þingmanna. Ég skil alveg að einstaka þingmenn eru í stjórnmálaflokkum sem mynda ríkisstjórnir en þá verða menn að gera grein fyrir því hvers vegna þeir standa ekki við það sem þeir hafa sagt áður. Það á því miður m.a. við forsætisráðherra.”

Þetta segir Einar Sigurðsson, stjórnarformaður Ísfélagsins í samtali við Eyjafréttir aðspurður um veiðigjaldafrumvarpið sem verður væntanlega að lögum á morgun.

Hann segir það er öllum ljóst t.d. að miða við 80% af makrílverði í Noregi sé einfaldlega rangt. „Það liggja fyrir gögn frá norska uppboðsmarkaðnum hvað íslensk skip hafa fengið samanborið við norsk. Það er á bilinu 40% til rúmlega 60% á því tímabili sem við veiðum mest af okkar makríl. Í einu tilviki fékk íslenskt skip hátt í 70% af norsku verði, og það var í ágúst lok þegar fiskurinn er betri og feitari. Í nokkrum tilvikum hafa íslensk skip sem hafa ætlað sér að landa í Noregi ekki einu sinni fengið tilboð.”

Greinin greiðir í ár 12-13 milljarða í auðlindagjöld

Einar segir erfitt að átta sig á endanlegum afleiðingum, það séu margar breytingar sem hafa áhrif á rekstur sjávarútvegsins. „Það er ljóst að til skemmri tíma dregur úr fjárfestingum meðan menn ná utan áhrifin. Það mun bitna á iðnaðarmönnum og öðrum slíkum á landsbyggðinni. Það mun aukast útflutningur á óunnum fiski, það á sér nokkrar skýringar, samkeppnisstaðan er verri, laun eru há á Íslandi samanborið við samkeppnislönd og hærri gjaldtaka bitni auðvitað á fyrirtækjum.

Ég á auðvitað von á hagræðingu eins og þegar gjöldin voru hækkuð árið 2012. Síðan þá hefur orðið talsvert meiri samþjöppun. Það sama mun líklega gerast núna. Það virðist því miður gleymast í umræðunni og mér finnst lélegt af þeim stjórnmálamönnum sem vilja láta taka sig alvarlega að halda því ekki til haga að í dag er skattspor sjávarútvegsins hátt og greinin er að greiða í ár á milli 12-13 milljarða í auðlindagjöld.”

Í heildina telur Einar að hækkunin á Vestmannaeyjar slagi í hátt í tvo milljarða. „Það er gríðarleg hækkun ef tölurnar í frumvarpinu eru réttar. Þetta bitnar mest á Vestmannaeyjum og Fjarðabyggð. Í ofanálag eru tölurnar í frumvarpinu rangar og því gjaldtakan á einstaka tegundir mun hærri en lagt var upp með í frumvarpinu, þ.e. sem hlutfalla af hagnaði útgerðar.”