Kvennalið ÍBV tekur í dag á móti 1. deildarliði Hetti frá Egilsstöðum í 16-liða úrslitum Borgunarbikarsins. Leikurinn fer fram á Hásteinsvelli og hefst klukkan 14:00 en gengi ÍBV í síðustu leikjum hefur verið mjög gott og er liðið í þriðja sæti Pepsídeildarinnar. Höttur hefur hins vegar leikið tvo leiki í A-riðli 1. deildar, gegn nágrönnum sínum í Fjarðarbyggð og Sindra en Höttur hafði betur í báðum leikjunum. Það verður því spennandi að sjá hvort 1. deildarliðið nái að stríða úrvalsdeildarliðinu í dag.