Í gær var áhöfn Þórunnar Sveinsdóttur tilkynnt um að til standi að setja skipið á söluskrá. Þetta herma heimildir Eyjafrétta. Samkvæmt sömu heimildum segir að ekki hafi komið til uppsagna.

Þórunn Sveinsdóttir VE-401 er togari sem er í eigu Óss ehf., dótturfélags Vinnslustöðvarinnar. Vinnslustöðin hf. keypti allt hlutafé í félaginu árið 2023 ásamt hlutafé í Leo Seafood, fiskvinnslu sem var að meirihluta í eigu sömu aðila.

Fram kom nýverið að Vinnslustöðin hafi verið rekin með 500 milljón króna tapi í fyrra og námu skuldir og skuldbindingar félagsins um 44 milljörðum króna. Leiða má að því líkum að frumvarp sem nú liggur fyrir Alþingi um hækkun veiðigjalda vegi þungt í þessari ákvörðun forsvarsmanna fyrirtækisins. Nánar verður fjallað um málið síðar í dag hér á Eyjafréttum.