Ferðasjóður íþróttafélaga hefur fengið árlegt framlag á Fjárlögum Alþingis, allt frá árinu 2007. Sjóðurinn er hugarfóstur Stefáns Jónassonar bæjarfulltrúa í Vestmannaeyjum og það er ánægjulegt að Alþingi bætti verulega í ferðasjóðinn og vegna keppnisferða ársins 2017 fær íþróttafólk í Vestmannaeyjum um 1 milljón á mánuði eða  12.203.727 úthlutað fyrir árið 2017.

Það er mikilvægt að Alþingi hefur aukið framlög sín í Ferðasjóð íþróttafélaganna á síðustu árum og þannig komið betur til móts við ferðakostnað félaganna enda er hann oft á tíðum þyngsti kostnaðurinn í ársreikningum flestra íþróttafélaga á landsbyggðinni. Við þekkjum það öll hvað þessi búbót er mikilvæg fyrir rekstur íþróttafélaganna og buddu foreldranna sem oft á tíðum verða að standa undir ferðakostnaði barna sinna til fjarlægari keppnisstaða. Eftir að ég sjálfur sé rekstur íþróttafélaganna í meiri fjarlægð dáist ég meir og meir af þeim einstaklingum sem leggja á sig mikla samfélagslega vinnu við að halda úti rekstri félaganna sem sjaldan er þakkaður.

Það eru margir frammámenn í íþróttahreyfingunni í Eyjum sem hafa gert góða hluti, en fáir sem hafa haft jafn viðtæk áhrif og koma jafn mörgum til góða og hugmynd Stefáns Jónassonar um ferðasjóð til handa íþróttamönnum á landsbyggðinni.

Til upplýsinga fyrir lesendur greinarinnar birti ég lista yfir úthlutanir vegna ársins 2017 og minni okkur þingmenn á hvað það er mikilvægt að auka enn frekar framlög í Ferðasjóð íþróttafélaga til að auðvelda rekstur þeirra. Á árinu 2017 bárust Ferðasjóði íþróttafélaga 250 umsóknir frá 129 félögum úr 21 íþróttahéraði vegna 2.972 keppnisferða í 21 íþróttagrein.