„Þeir frá Krönum ehf. eru að vinna fyrir okkur að endurbyggingu Gjábakkakants eftir að í ljós kom að þilið er ónýtt,“ sagði Dóra Björk Gunnarsdóttir, hafnarstjóri Vestmannaeyja um framkvæmdir í norðurhöfninni.

Er verið að reka niður stálþilið en undanfarið hafa starfsmenn Krana keyrt efni með bryggjukantinum. „Nýr kantur verður þannig að ekjufraktskip eða Róróskip geta legið við Kleifarnar og með skutinn við Gjábakkann þar sem verður rúmlega 20 metra breiður skái. Skáinn verður svipaður og er í Þorlákshöfn þar sem hægt sé að aka frá borði og um borð,“ sagði Dóra Björk.

Þetta er mikil framkvæmd og er kostnaður fyrsta hluta áætlaður um 300 milljónir króna. „Við áætlum að ljúka verkinu sumarið 2026 en við stefnum að því að geta tekið á móti 140 metra ekjuskipum núna í nóvember. Verður þetta góð viðbót í þjónustu hafnarinnar og  í takt við vaxandi umsvif í Vestmannaeyjum,“ sagði Dóra Björk.