Vel heppnaðri loðnuvertíð lauk í síðustu viku og náðu bæði Ísfélag og Vinnslustöð að klára kvótann.

„Við erum búin að veiða allar okkar heimildir í loðnu og kláruðum vinnslu um helgina,“ sagði Sindri Viðarsson sviðsstjóri uppsjávarsviðs Vinnslustöðvarinnar þegar rætt var við hann. „Við erum virkilega ánægð með hvernig vertíðin hefur gengið og framleiðslan hefur verið í takt við áætlanir,“ sagði Sindri.

Samtals ráða Ísfélag og Vinnslustöð yfir þriðjungi heildarkvótans og er Ísfélagið með 30.000 tonn og Vinnslustöðin 20.000 tonn. Stærsti hlutinn var unninn til manneldis, loðnan fryst og hrognin unnin á lokasprettinum. Forsíðuna prýða Eiríkur Arnórsson og Albert Sævarsson, skipverjar á Heimaey VE.

Óskar Pétur, ljósmyndari Eyjafrétta tók myndirnar í túr með Heimaey.