„Það eru allir við hesta heilsu um borð og líka þeir sem eru í sóttkví í landi, engin fengið nein einkenni,“ sagði Gylfi Sigurjónsson skipstjóri á Þórunni Sveinsdóttur í samtali við Eyjafréttir en allir áhafnarmeðlimir úr síðasta túr á Þórunni voru sendir í sóttkví eftir að upp kom Covid-19 smit hjá einstakling sem hafði verið um borð í bátnum. „Túrinn hefur bara gengið vel þeir eru komnir með einhver 330 kör sem þeir náðu í austur á Öræfagrunni. Þeir verða í landi í fyrramálið og þá fara allir í skimun. Þá er komin vika frá því mannskapurinn var síðasta í samskiptum við þann sem greindist. Annars er andinn um borð bara nokkuð góður. Báturinn var allur sótthreinsaður í bak og fyrir þegar þetta kom upp og svo hafa menn sinnt smitvörnum eftir leiðbeiningum síðan þá.“ Aðspurður sagði Gylfi að sá sem hafi greinst jákvæður hafi ekki verið alvarlega veikur þegar þeir ræddu síðast saman.