- Eyjafréttir
- ·
- Sjávarútvegur
- ·
Ritstjórn
Ísfisktogararnir í Síldarvinnslusamstæðunni hafa landað góðum afla síðustu dagana. Frá þessu er greint á fréttasíðu fyrirtækisins. Jóhanna Gísladóttir GK landaði í Grindavík á sunnudagsmorgun og þá lönduðu einnig Vestmannaey VE og Bergey VE í Vestmannaeyjum. Gullver landar síðan í Hafnarfirði í dag.
Einar Ólafur Ágústsson, skipstjóri á Jóhönnu Gísladóttur, sagði að landað hefði verið fullfermi og aflinn verið mest þorskur. „Við vorum að veiðum á Kópanesgrunni. Byrjað var á grunnslóðinni en þar fékkst heldur lítið. Þá færðum við okkur utar og þar var góður afli. Við vorum einungis tæpa tvo sólarhringa að veiðum þannig þetta gekk virkilega vel,” sagði Einar Ólafur.
Vestmannaey og Bergey lönduðu einnig fullfermi í Eyjum. Ragnar Waage Pálmason, skipstjóri á Bergey,sagði að túrinn hefði gengið vel. „Við vorum að veiðum á Höfðanum, í Breiðamerkurdýpi og enduðum síðan á Pétursey. Aflinn var langmest ýsa. Veður var heldur slæmt til að byrja með en lagaðist síðan,” sagði Ragnar.
Birgir Þór Sverrisson, skipstjóri á Vestmannaey, var einnig ánægður með veiðiferðina. „Þetta var um tveir og hálfur sólarhringur þannig að það er ekki hægt að kvarta. Við byrjuðum á Ingólfshöfðanum og tókum síðan eitt hol á Víkinni. Aflinn var mest ýsa og það er búin að vera góð ýsuveiði í febrúarmánuði. Það er alltaf að koma loðna með suðurströndinni og henni fylgir mikill fjöldi hvala,” sagði Birgir Þór.
Þórhallur Jónsson, skipstjóri á Gullver, sagði að túrinn hefði byrjað fyrir austan. „Við byrjuðum á að fá ýsu og þorsk á Papagrunni en síðan var haldið vestureftir. Við vorum mest á Melsekk og þar var góð karfaveiði. Síðan var leitað að ufsa á Eldeyjarbanka og á Reykjanesgrunni með heldur litlum árangri. Aflinn í túrnum var 106 tonn, mest karfi en einnig töluvert af ýsu og þorski,” sagði Þórhallur.
Jóhanna Gísladóttir hélt til veiða á ný síðdegis á sunnudag og Vestmannaey og Bergey á miðnætti á sunnudaginn. Gullver mun halda til veiða síðdegis í dag.
