Eygló Egilsdóttir þjálfari og jógakennari rekur Metabolic í Vestmannaeyjum, en Eygló tók við Metabolic fyrr á þessu ári og þjálfar nú þar ásamt þeim Dóru Sif Egilsdóttur og Aniku Heru Hannesdóttur. Áður en Eygló tók við hér í Eyjum hafði hún ekki einungis starfað við, heldur helgað líf sitt opnun og uppbyggingu á æfingastöðinni Metabolic Reykjavík. ,,Frá 2009 hef ég einnig starfað sem ég jógakennari og hef alla tíð kennt jóga samhliða þjálfuninni, ég stofnaði meðal annars fyrirtæki sem bauð upp á jógatíma fyrir starfsfólk á vinnutíma; Jakkafatajóga. Einnig skrifaði ég bók um jóga og núvitund og gaf út vorið 2018 og svo vann ég um tíma hjá Eyjafréttum undir stjórn Ómars, það var lærdómsríkur og góður tími.”

Mín helsta ástríða er að hjálpa fólki að koma einhverskonar heilsusamlegri hreyfingu inn í annasamt daglegt líf segir Eygló. ,,Það er eiginlega ótrúlegt að hugsa til þess að ég hóf starfsferil minn sem bankastarfsmaður á því eftirminnilega ári 2007 og kannski var hrunið það sem ýtti mér út í að leita á önnur mið, og það get ég þakkað fyrir.”

Hvað stendur Metabolic fyrir og hvernig er það frábrugðið öðrum þjálfunaraðferðum?

Metabolic er íslenskt æfingakerfi sem er hannað af Helga Jónasi Guðfinnssyni, sem er líklega helst þekktur fyrir afrek sín inni á körfuboltavellinum þar sem hann var landsliðsmaður lengi vel. En seinni árin hefur hann einbeitt sér að Metabolic þjálfun ásamt styrktarþjálfun íþróttaliða í körfu og knattspyrnu.

Það sem gerir þetta æfingakerfi frábrugðið er að það byggist á orkukerfum líkamans, það kann að hljóma skringilega í eyrum þeirra sem ekki þekkja til, en það byggir á því hvaða skilaboð þjálfunin sendir inn í líkamann; og á endanum, hvaða signal fer inn í frumurnar; uppbygging eða niðurbrot. Við þurfum bæði! og líkaminn getur bara gert annað hvort í einu; byggt upp eða brotið niður. Þannig að stundum erum við að æfa styrk eða kraft (uppbygging) eða þol eða brennslu (niðurbrot). Tímarnir innihalda því alltaf eitt þema í einu til að rugla ekki kerfið um of.

Tímarnir eru hannaðir inn í daginn hjá uppteknu nútímafólki þar sem æfingin sjálf, keyrslan, er alltaf á bilinu 20-25 mínútur og fólk er því að ná að koma “inn og út” af æfingu á um 45 mín með upphitun, æfingunni, ,,finisher” og teygjum.

Það sem heillaði mig mest við kerfið þegar ég kynntist því fyrst, er að hvíldir eru innbyggðar inn í æfingakerfið, því álagið kemur í 4 vikna bylgjum; byrjar í viku 1 og eykst stöðugt þangað til viku 4 er náð og þá byrjar hringurinn upp á nýtt. Viku 1 má nýta sem virka hvíld, þó við séum að æfa, þá eru hvíldir lengri og æfingaval oft einfaldara. Við vitum að á 4-8 vikna fresti er gott að taka ,,de-load” viku, vegna þess ef við höldum stöðugt áfram að auka álagið eykst hætta á álagsmeiðslum – því engum finnst gaman að sleppa æfingum til að hvíla! Stundum líður okkur þannig að það er ekkert vit í hvíldarviku – þá er upplagt að nota viku 1 sem þyngingar tímabil, en við lengri hvíldir og styttri vinnutími er upplagt að máta nýjar þyngdir og reyna svo að halda sig við þær út viku 4.

Hvað varð til þess að þú ákvaðst að bjóða upp á Metabolic?

Upphaflega fékk ég símtal frá herbúðum Helga, en þau vildu bera undir mig hugmyndina um að opna útibú Metabolic í Reykjavík, en Metabolicstöðvar voru þá allmargar um allt land. Þetta var árið 2013 og ég var nýbúin með einkaþjálfaranámið hjá Keili, þar sem ég hafði einmitt kynnst Helga þar sem hann starfaði við kennslu. Ég var spennt fyrir hugmyndinni að stofna minn eigin rekstur utan um þessa þjáfun, innan ramma Metabolic og í nánu samstarfi við Helga og hina þjálfarana.

Ég byrjaði í samstarfi við hverfisræktina í Árbæ og var þar í þrjú ár, og þá var starfsemin með svipuðu sniði og hjá Metabolic Eyjar í dag, en árið 2019 opnaði svo Metabolic Reykjavík í eigin húsnæði við Stórhöfða í Reykjavík.

Eftir að ég fluttist til Eyja var ég svo heppin að vera í góðum samskiptum við Minnu og Steinu og þegar í ljós kom að þær höfðu hug á að selja var ekki aftur snúið. Ég elska þennan ramma sem Metabolic kerfið hefur, býður upp á allt sem við þurfum í þjálfun og ég veit að ég er alltaf með nýjustu og bestu aðferðir því Helgi, sem hannar kerfið, elskar að lesa rannsóknir um þjálfun og er duglegur að setja nýjustu upplýsingar inn í æfingarnar okkar á gólfinu.

Hvernig hefur þátttakan verið síðan þú tókst við Metabolic í Eyjum?

Við Anika og Dóra ákváðum að byrja önnina á að bjóða upp á opna fríviku sem sló eiginlega öll mætingamet, fjöldinn í sumum tímum var svo mikill að við heyrðum af því eftir á að hjón sem voru mætt í sama tímann, vissu ekki hvort af öðru fyrr en á leiðinni út eftir tímann. Við erum hæstánægðar með aðsóknina og hún fór fljótlega fram úr okkar björtustu vonum og spám. Við tókum þá ákvörðun í byrjun nóvember að selja ekki fleiri áskriftir í bili, þannig viljum við reyna að tryggja að allir fái þann búnað sem þeir þurfa og hafi nægt pláss,  enda er mætingin í tímana alveg ótrúlega góð.

Hver eru framtíðarplönin?

Það væri náttúrulega draumur að geta komist í eigið húsnæði og komast í sömu stöðu og Metabolic Reykjavík hvað varðar aðstöðumál og framboð á tímum. En við vitum að góðir hlutir gerast hægt, það tók 3 ár að byggja upp reksturinn í Árbæ áður en Reykjavíkurstöðin opnaði, það er spurning hvort góðu hlutirnir gerist hraðar hér í Eyjum, við vonum það. En fyrst og fremst viljum við bjóða upp á sífellt betri þjónustu fyrir breiðari iðkendahóp, við vorum til dæmis mjög glaðar að geta sett af stað mömmunámskeið í samstarfi við Önnu Huldu og viljum endilega skoða möguleikann á frekara samstarf og fleiri svona lokuðum námskeiðum fyrir hópa.

Myndir: Sigfús Gunnar