Töluverðar framkvæmdir standa nú yfir í Íþróttamiðstöð Vestmannaeyja og miðar verkinu vel áfram. Samkvæmt upplýsingum á vef Vestmannaeyjabæjar eru bæði tæknilegar endurbætur og breytingar á aðstöðu langt komnar og stefnt að verklokum á næstu vikum.

Uppsetning sandsía og tilheyrandi tengingar eru langt komnar og stefnt er að því að ljúka framkvæmdum um næstu mánaðamót, samkvæmt upplýsingum sem birtar eru á vef Vestmannaeyjabæjar.

Um þessar mundir er unnið að lagningu lagna að og frá síunum og áfram að dælubúnaði. Samhliða því er verið að smíða nýja rafmagnstöflu sem mun hýsa stjórnbúnað ásamt öllum nauðsynlegum tengingum við dælur og skynjara.

Verkið gengur samkvæmt áætlun og er gert ráð fyrir að pípulagningarmenn ljúki sínum verkþætti um miðjan febrúar. Að því loknu taka rafvirkjar við og ganga frá rafbúnaði og tengingum áður en verkefninu verður formlega lokið.

Auk þessara framkvæmda hefur verið útbúin ný skrifstofuaðstaða fyrir kennara, þar sem fyrri aðstaða þeirra var á svæði sem World Class er nú að stækka líkamsræktaraðstöðu sína á. Þá er afgreiðslan einnig á lokametrunum og er gert ráð fyrir að hún verði tilbúin fyrir lok næstu viku.