Sundlaugin í Vestmannaeyjum hefur verið lokuð frá 19. mars. Þá greindist starfsmaður íþróttamiðstöðvarinnar með kórónuveirusýkingu. Öðrum sundlaugum landsins var svo lokað 24. mars og hefur verið lokað síðan. Tilkynnt var í byrjun þessa mánaðar að þær yrðu opnaðar á ný 18. maí.

Þórólfur Guðnason sóttvarnalæknir sagði á upplýsingafundi í gær að hann myndi leggja til að fjöldi sundlaugargesta fari ekki yfir helmingsfjölda þeirra gesta sem leyfi er fyrir, eða staðurinn getur tekið á móti. Einnig verði tveggja metra fjarlægðarmörk virt eins og kostur er.

„Hugmyndin er síðan hjá mér að það væri hægt að auka fjölda gesta fram til 15. júní, kannski í einu viðbótarskrefi en þá muni vonandi vera hægt að leyfa hámarksfjölda. Allt er þetta náttúrulega háð því að það gangi vel með faraldurinn áfram,“ sagði Þórólfur.