Nýsköpun í uppsjávariðnaði fær nú sérstaka athygli með tilkomu Grettis Jóhannessonar, sem tók nýverið við nýju starfi hjá Félagi uppsjávariðnaðarins og Þekkingarsetri Vestmannaeyja. „Ég hef aðstöðu hjá Þekkingarsetri Vestmannaeyja, þar sem mér hefur verið tekið afar vel,“ segir Grettir, sem hefur hafið vinnu við að skoða lista af hugmyndum með mögulegum tækifærum. „Markmiðið er að færa hugmyndir af nýsköpunarstigi yfir á framkvæmdastig. Þá er gott að hafa öflugan bakhjarl í Félagi uppsjávariðnaðarins.“

Grettir er Eyjamaður, viðskiptafræðingur með mastersgráðu í fjárfestingarstjórnun og löggildingu til verðbréfamiðlunar. Hann var valinn úr hópi fjölda umsækjenda. Samstarfssamningur um verkefnið var undirritaður af Félagi uppsjávariðnaðarins, Þekkingasetri Vestmannaeyja og Gretti í húsnæði Bæjarveitna fimmtudaginn 5. september.

„Það er afar spennandi að fá tækifæri til að móta hlutina frá grunni,“ segir Grettir. „Ég hlakka til að vinna að fjölbreyttum verkefnum sem geta haft jákvæð áhrif á greinina.“

Grettir er með aðsetur á þriðju hæð Þekkingarsetursins þar sem hann er að koma sér fyrir. „Þetta starf er mjög opið og fjölbreytt,“ útskýrir hann. „Fyrstu dagarnir fara í að kortleggja hugmyndir sem gætu átt möguleika á að komast á næsta stig. Eftir áramót fer ég í hringferð um landið til að kynna þær fyrir öllum tíu aðildarfélögum Félags uppsjávariðnaðarins. Í kjölfarið verður tekin ákvörðun um hvaða hugmyndir verða settar í forgang.“

„Ég hlakka til að takast á við þetta nýja og spennandi starf og stuðla að nýsköpun og framþróun í uppsjávariðnaðinum,“ bætir hann við að lokum.

Saminginn undirrituðu Grettir, Sigurgeir Brynjar Kristgeirsson, framkvæmdastjóri Vinnslustöðvarinnar og Tryggvi Hjaltason, formaður stjórnar Þekkingarsetursins.