Iceland Offshore Salmon ehf. hefur sótt um tilraunaleyfi fyrir úthafseldi á svæði vestur af Vestmannaeyjum. Jafnframt er horft til Grindavíkurdýpis suður af Grindavík, að því er fram kemur í umfjöllun Fiskifrétta.

Kjartan Ólafsson, eigandi og framkvæmdastjóri Iceland Offshore Salmon ehf., er jafnframt stjórnarformaður Arnarlax og situr í stjórn Laxeyjar í Vestmannaeyjum. Þá á hann hlut í norska hafeldisfyrirtækinu Aqualoop þar sem hann situr einnig í stjórn.

„Við sjáum fyrir okkur að þetta verði eins konar iðnaðargarður þar sem hægt verður að rækta fisk í sjónum í stórum stíl,“ segir Kjartan í samtali við Fiskifréttir. Hann bendir á að Laxey framleiði stór laxaseiði sem ætluð séu til áframeldis í sjó. Að hans sögn er verkefnið liður í undirbúningi úthafseldis vestur af Vestmannaeyjum.

Nánara viðtal við Kjartan má lesa á vef Fiskifrétta.