Það voru tímamót þegar Hressó lokaði eftir 30 ár á föstudaginn, 30. maí sl. Í þrjá áratugi hefur Líkamsræktarstöðin Hressó verið ein af stoðum samfélagsins í Eyjum. Hjartað í Hressó hefur verið frá upphafi systurnar Anna Dóra og Jóhanna Jóhannsdætur sem opnuðu Hressó á þrettándanum 1995.  Þangað hafa þúsundir sótt líkamlegan og andlegan styrk og ekki síst félagsskap og samveru sem er mesta eftirsjáin þegar upp er staðið. Spjall fyrir og eftir tíma um allt og ekkert og systurnar ófeimnar að segja sína skoðun.

Starfsemin var fjölbreyttari en margan grunar, stöðvar á þremur stöðum og fjölbreyttir tímar. Í Stóra Hressó var boðið upp á fjölbreytta líkamsræktartíma og tækjasal, í Íþróttamiðstöðinni var þreksalur og svo erCrossfitEyjar staðsett að Hlíðarvegi. Boðið var upp á fjölbreytta tíma, m.a. Crossfit, Spinning, Core tíma og Yoga í heitum sal.

Fyrir þann sem þetta skrifar er eftirsjáin mikil en líka þakklæti fyrir frábæra samleið í 30 ár.  Anna Dóra og Jóhanna kvöddu á Facebook: Stór tímamót! Síðasti dagurinn eftir 30 àra farsæla sögu! Hressó kveður og þakkar ykkur öllum sem hafa átt viðskipti við okkur í gegnum árin. Ást og friður – Bendum á Prentsmiðjan Gym fyrir æfingaþyrsta – Open gym og tímar í boði.

Síðasti tíminn  á Hressó var í hádeginu á föstudaginn og honum stýrðu Jóhanna og Dagmar Skúla af mikilli snilld og krafti. Á eftir var saknaðarstund en líka þakklæti til þeirra systra fyrir árin 30. Nú er bara að leita á ný mið og Prentsmiðjan Gym hjá Gilla Hjartar er fyrsti kosturinn.

Hér birtast nokkrar myndir af síðustu dögum Hressó. Kristján Egilsson tók myndirnar frá lokadeginum.

Hresso14