Lokaleikur 12. umferðar Olísdeildar karla fer fram í Eyjum í dag, þegar ÍBV tekur á móti Val. Valsmenn með 14 stig í þriðja sæti deildarinnar, en Eyjaliðið í sjötta sæti með 11 stig.

Í tilkynningu frá handknattleiksdeild ÍBV segir að í dag, 30. nóvember hefði Kolbeinn Aron Ingibjargarson eða Kolli eins og hann var ávallt kallaður orðið 35 ára gamall. Kolli var öflugur markvörður og litríkur karakter sem átti stóran þátt í vexti og velgengni handboltans í Vestmannaeyjum. Hann lék 279 leiki með ÍBV allt þar til hann kvaddi okkur alltof snemma í desember 2018.

Í tilefni afmælisins ákvað fjölskylda Kolla að láta útbúa sérstakan afmælisbjór sem þau gáfu handknattleiksdeild og óskuðu eftir að hann yrði seldur í upphitun fyrir leik ÍBV og Vals í Olísdeild karla á morgun, laugardag.

Upphitun hefst í gamla salnum kl.15.00 þar sem Kollabjórinn verður til sölu ásamt pizzu frá Pizza 67. Þar ætlum við að eiga saman góða stund, ylja okkur við minningar um góðan dreng og hita upp fyrir leikinn. Mætum í hvítu og hlökkum til að sjá sem allra flesta, segir í tilkynningunni en leikurinn hefst klukkan 16.00.