Svava féll fyrir Vestmannaeyjum – Sjómannskona í hótelrekstri:

Svava Gunnarsdóttir og Stefán Birgisson hafa búið í Vestmannaeyjum frá árinu 1990. Þau koma frá Siglufirði og byrjuðu búskap fyrir norðan. Þrjú af börnum þeirra eru fædd á Siglufirði en tvö þau yngstu í Vestmannaeyjum. Eftir heimsókn árið 1990 var ákveðið að flytja til Eyja og sjá þau ekki eftir því. Hann kláraði Stýrimannaskólann og var á sjónum á meðan hún sinnti börnum og búi. Bættu aðeins við sig þegar þau keyptu heilt hótel sem í dag er stóra verkefnið þeirra.

„Ég kom hingað á vertíð 1977 og var í Ísfélaginu í hálft ár.  Við Stebbi vorum búin að vera kæró áður en ég fór til Eyja. Eitthvað hefur hann átt í hjarta mínu því sama dag og ég kom heim til Siglufjarðar, fimmtudaginn 11.  ágúst 1977 byrjuðum við saman og erum enn,“ segir Siglfirðingurinn, Eyjakonan, sjómannskonan og hótelrekandinn Svava í stuttu spjalli við Eyjafréttir.

Þau búa á Siglufirði í 13 ár og  flytja til Vestmannaeyja árið 1990 eftir stutta heimsókn. „Þá var Stebbi að pæla í að fara í Stýrimannaskólann. Systir mín bjó hérna og við ætluðum að vera hjá henni í viku en það varð mánuður. Og við með þrjú börn. Í heimsókninni langaði Stebba að fara á sjó í Eyjum og var svo heppinn að komast túr á Katrínu VE með þeim feðgum, Gísla Sigmarssyni og Sigmari. Þegar hann kom í land keyrði hann okkur heim til Siglufjarðar, aftur til Eyja og við öll til baka mánuði seinna.“

Eyjarnar heilluðu

Stefán útskrifaðist frá Stýrimannaskólanum vorið 1993 og stundaði sjóinn þar til hann hætti fyrir tveimur árum.  „Við ætluðum alltaf heim eftir tvö til þrjú ár en hér erum við enn og líkar mjög vel,“ segir Svava og þá var Siglufjörður heima.

„Það er margt líkt með Siglufirði og Vestmannaeyjum sem er stærri bær, meiri umsvif og meira um að vera. Það heillaði. Maður hugsaði líka til þess að hér er framhaldsskóli og ekki þurfti að senda krakkana í burtu eftir grunnskóla. Fannst bara, að þegar ég kom til Eyja, að ég væri komin heim. Hér taka allir svo vel á móti manni sem er ómetanlegt. Næst tók við þetta hefðbundna líf, Stebbi á sjónum og ég heima með börnin sem fjölgaði úr þremur í fimm,“ segir Svava og börnin eru Birgir, Hilmar, Kolbrún Inga, Gunnar Þór og Hrafnhildur.

Leist ekkert á blikuna

Næst víkjum við að örlaga árinu 2011 þegar fjölskyldan kaupir Hótel Hamar. „Það var ekki ég sem keypti hótelið. Því var fjarstýrt frá Kína þar sem Birgir sonur okkar býr með fjölskyldu sinni. Honum og pabba  hans fannst þetta sniðugt en mér ekki,“ segir Svava og hlær. „Stebbi var búinn að skoða Hótel Vestmannaeyjar en ég var ekkert hrifin að fara út í svona rekstur. Verið sjómannskona í öll þessi ár, nánast ein með fimm börn og fannst þetta ekki góð hugmynd.“

Úr varð að þau kaupa Hótel Hamar af Gísla Val Einarssyni sem þá var í mánaðarleigu. Gísli átti einnig Hótel Vestmannaeyjar. „Þetta var um haustið og tveimur mánuðum áður en við skrifuðum undir vorum við byrjuð að leigja út hótelið án þess að ég vissi. Ég var að hengja út þvott þegar Þór Vilhjálms í Vinnslustöðinni kallar til Stebba, gengur þetta ekki upp? Stebbi svarar; Ekkert mál, sendu þá bara í kvöld. Ég sneri mér að Stebba og sagði; er ekki í lagi með þig? Við eigum ekki hótelið en hann sagði þetta í lagi, Gísli var búinn að gefa leyfi.“

Svava  segir, að það að reka hótel sé um flest ólíkt annarri vinnu. Margt komi upp á og oft þurfi að bregðast hratt við. Hún segir álagið mikið en Stefán hafi unnið með henni í öllum inniverum og fríum á meðan hann var á sjónum. „Núna er hann á kafi í þessu með mér og var á fullu með iðnaðarmönnum þegar við endurnýjuðum baðherbergin í vetur og skiptum um glugga og klæddum Ösku í vetur. Gunnar Þór sem var 15 ára þegar við keyptum var ekki sáttur. Hringdi í mig og spurði hvort við gætum ekki haft kvöldmatinn á sama  tíma og áður, klukkan sjö. Ég alltaf á leiðinni heim, ein í vinnu, alltaf bættust við verkefni og maturinn aldrei á réttum tíma.“

Samhent fjölskylda

Í öllum stærri verkum höfum við staðið saman fjölskyldan, Birgir sem hefur búið í Kína í 20 ár og Hilmar láta sig ekki vanta.  Hrafnhildur dóttir okkar byrjaði tólf ára og hefur unnið hjá okkur með skóla öll sumur. Er í dag mín hægri hönd þó henni hafi ekki litist á fyrsta sumarið. Kolbrún Inga hefur verið okkur ómetanleg. Búið erlendis í tólf ár en unnið hjá okkur á sumrin.

Hún kom til okkar í janúar 2016, ófrísk og átti að eiga í maí. Hún fer í morgunmatinn 26. apríl og hringir í mig. Segist vera illt í maganum en ætli að klára morgunmatinn og leggja sig. Mig grunaði annað, náði í hana og upp á spítala. Beint í sjúkraflug til Reykjavíkur og þar fæddist drengur fimm tíu  mínútum seinna. Ekkert gefið eftir,“ segir Svava.

„Sjálf er ég þannig að ef ég tek eitthvað að mér vil ég gera það vel. Alltaf með símann opinn og tilbúin að stökkva þegar eitthvað vantar eða kemur upp á. Er alltaf á vaktinni og verkefnin næg. Við höfum bætt við okkur eignum  á fimm ára fresti, keyptum svefnklefana 2016 og Ösku Hostel  fimm árum seinna. Ég ætla svo að vona að eftir fimm ár verðum við búin að selja og ég komin í frí,“ segir Svava en afraksturinn eru ánægðir viðskiptavinir.

„Mér finnst ég vera að taka á móti gestum inn á mitt heimili. Tek jafn vel á móti fólki sem kemur á hótelið og það væri að koma heim til mín. Við erum að þjónusta þau eins vel og við getum og fáum mikið hrós fyrir. Það gefur mikið og eitt  get ég sagt, það er aldrei leiðinlegt í vinnunni.“

Ómar Garðarsson.