Loðna víða en óvíst um magnið

Loðnuleit fjögurra skipa, sem hófst um helgina, er um það bil að ljúka. Hafrannsóknastofnun segir þó lítið hægt að segja á þessu stigi um niðurstöður leitarinnar.

Guðmundur Óskarsson, sviðstjóri uppsjávarsviðs Hafrannsóknastofnunar, segir í samtali við Fiskifréttir að það sé ekki fyrr en mannskapurinn og tölur séu komnar í hús og farið verði að vinna úr þeim sem hægt verði að meta árangurinn af loðnuleit síðustu daga. Leitin hafi hins vegar gengið mjög vel.

„Það hefur verið fínt veður hingað til.“ Búist var við leiðindaveðri seint í gær og í nótt, „en þeir verða nú búnir með mest af þessu sýnist mér áður en það skellur á,“ sagði Guðmundur þegar Fiskifréttir náðu tali af honum í gærmorgun.

Hann sagði loðnu sjást víða á svæðinu, en skipin hafa flest verið að mæla fyrir norðan land á sömu slóðum og Polar Amaroq fyrir stuttu.

„Vestasta skipið, Ilvid, hefur verið á Grænlandssundi en hafísinn hefur verið að trufla þar. En það er meira ungloðnusvæði og ætti þess vegna ekki að hafa áhrif á markmið leiðangursins.“

Engin þátttaka í útboði
Samtök fyrirtækja í sjávarútvegi fjármögnuðu þessa leit, en næst verður væntanlega haldið í hefðbundna loðnuleit á Árna Friðrikssyni í fyrri hluta janúar. Síðan verður farið í fleiri loðnumælingar í framhaldi af því, eins og áður hefur verið gert. Óvíst er þó hvort fleiri skip verða til taks í þær.

„Við vorum með útboð í loðnumælingarnar en það var engin útgerð sem bauð í það,“ segir Guðmundur. „Við þurfum þá að eiga samtal við þá og reyna að semja um þetta og á von á að það gangi vel.“

Minnir á fyrri tíma
Grænlenska skipið Polar Amaroq fann nokkuð magn af kynþroska loðnu austarlega fyrir norðan land í leiðangri sínum seint í nóvember. Guðmundur segir að það hafi komið nokkuð á óvart hversu austarlega hún var komin miðað við árstíma.

„Það minnir svolítið á fyrri tíma. Hún hefur ekki verið komin þetta snemma undanfarin ár, en við vitum ekkert hvað það þýðir nákvæmlega.“

Loðnubrestur hefur nú verið tvö ár í röð og margir bíða spenntir eftir niðurstöðum loðnuleitar. Alls óvíst er þó enn hvort hægt verði að ráðleggja veiðar, þótt vonir hafi vissulega glæðst.

„Við vonum auðvitað að það komi eitthvað út úr þessu, en þetta er náttúran sem við erum að eiga við og svo erum við með aflareglur sem við verðum að fylgja.“

Í tilkynningu frá atvinnuvegaráðuneytinu segir að ástæða þess að Hafrannsóknastofnun telji rétt að fara til mælinga núna sé „að mögulega sé loðnan fyrr á ferðinni en undanfarin ár. Á 9. og 10. áratug síðustu aldar var algengt að loðna væri gengin austur fyrir land í desember. Í ljósi sögunnar og upplýsinganna frá síðustu viku er ekki hægt að útiloka að hún muni á næstu vikum ganga austur fyrir land og verði í janúar komin á hafsvæði þar sem mælingar eru erfiðar, þ.e. við suðaustanvert landið.“

Nýjustu fréttir

Aðsend grein

Samgöngur við Vestmannaeyjar – framtíðarsýn eða bráðabirgðalausnir?

Íþróttir

Atli Steinn Arnarson semur við ÍBV

Áhugavert

World Class mun rísa samhliða búningsklefunum

Úr blaði Eyjafrétta

Skvísubúðin fagnar vori og sumri með fjölbreyttu vöruúrvali

Íþróttir

Stelpurnar æfa af krafti fyrir úrslitakeppnina

Aðsend grein

Vestmannaeyjar – staður þar sem fjölskyldan blómstrar

Fréttir

Sólarupprás og helgistund markaði páskadag í Eyjum

Aðsend grein

Borgarlína eða lífæð? Við erum að velja vitlaust

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki