Fyrsti loðnufarmur vertíðarinnar barst til Vestmannaeyja í morgun þegar uppsjávarskipið Sigurður VE 15 lagðist að bryggju með ríflega 900 tonna afla.

Sigurður hóf veiðar í gær ásamt Heimaey VE, skammt undan Hornafirði. Sigurður fékk um 900 tonn en Heimaey um 800 tonn og er nú að landa á Þórshöfn.

„Hrognafyllingin var 12–13 prósent og hrygnuhlutfallið og stærðir loðnunnar hentugar til frystingar. Við stefnum á að frysta hverja einustu loðnu úr förmunum,“ segir Eyþór Harðarson, útgerðarstjóri Ísfélagsins. Tvö önnur skip Ísfélagsins, Suðurey og Álsey eru á miðunum nú í morgunsárið og bindur Eyþór vonir við að veiðarnar þróist vel á næstu dögum.

Loðnan færist nú hægt og sígandi með suðurströndinni til vesturs og gæti það haft jákvæð áhrif á framhald vertíðarinnar. Veðurspáin ætti einnig að vera veiðum hagstæð um helgina. Sigurður kastaði þrisvar sinnum í túrnum. Fyrsta kastið var prufukast sem gaf um 20 tonn, en næstu köst voru mun stærri – um 500 tonn annars vegar og 400 tonn hins vegar.

Óskar Pétur Friðriksson, ljósmyndari Eyjafrétta var viðstaddur þegar Sigurður VE kom til hafnar í morgun og tók meðfylgjandi myndir.