Fjölskyldu- og tómstundaráð Vestmannaeyja fékk nýverið kynningu á stöðu fjárhagsaðstoðar fyrir árið 2025 frá deildarstjóra velferðarmála og sviðsstjóra fjölskyldu- og fræðslusviðs. Alls nam fjárhagsaðstoð sveitarfélagsins um 34,8 milljónum króna á árinu. Upphæðin skiptist í styrki, framfærslulán og stuðning við börn og unglinga.

Í kynningunni kom fram að Vestmannaeyjabær leggi ríka áherslu á að styðja einstaklinga til virkni og atvinnuleitar. Fjárhagsaðstoð sé fyrst og fremst hugsuð sem neyðaraðstoð á leið fólks í átt að atvinnu eða örorkulífeyri.

Hvetja til aukinna atvinnutækifæra

Í niðurstöðu ráðsins kemur fram að fulltrúar þakki fyrir kynninguna og hvöttu þeir jafnframt stofnanir og fyrirtæki í bænum til að taka þátt í að skapa atvinnutækifæri fyrir einstaklinga með skerta starfsgetu. Bent er á að slíkt samstarf sé meðal annars hægt að útfæra í gegnum Vinnumálastofnun með nýtingu ráðningarstyrkja.