Við marserum af stað í Mottumars í dag, föstudaginn 1. mars. Þá hefst sala á nýjum Mottumars-sokkum í verslunum um land allt og í vefverslun Krabbameinsfélagsins. Síðdegis opnar nýtt vefsvæði fyrir karla, karlaklefinn.is og ljósmyndasýningin Meiri menn opnar á sex stöðum á landinu.

Mottumars-sokkarnir
Mottumarssokkarnir eru hannaðir af Önnu Pálínu Baldursdóttur, nemanda í grafískri hönnun í Listaháskóla Íslands, sem bar sigur úr bítum í hönnnunarsamkeppni Krabbameinsfélagsins og Listaháskólans síðastliðið haust.

Í Karlaklefanum er að finna fræðsluefni af ýmsum toga sem sérstaklega er ætlað karlmönnum.Karlmenn leita sér upplýsinga í minna mæli en konur varðandi margt sem snertir heilsufar, þeir bregðast síður við einkennum og leita seinna til læknis. Markmið Krabbameinsfélagsins með Karlaklefanum er að auka áhuga karla á fróðleik og upplýsingum um heilbrigðan lífsstíl. Einnig um krabbamein og sjúkdómsferli, réttindamál, stuðning og viðbrögð aðstandenda og vinnufélaga svo dæmi séu tekin. Fyrsti áfangi vefsins opnar síðdegis í dag í tilefni af upphafi Mottumars.

Reynsluheimur karla með krabbamein
Ljósmyndasýningin Meiri menn byggir á persónulegum sögum átta karlmanna víðs vegar af landinu sem greinst hafa með ólíkar tegundir krabbameina. Sýningin fer fram í Karlaklefanumog á sex sýningarstöðum; í Kringlunni, Herrafataverslun Kormáks og Skjaldar, á Glerártorgi Akureyri, í JMJ herradeild á Akureyri, í Ráðhúsi Reykjanesbæjar og í Neistanum á Ísafirði. Það eru ljósmyndararnir Ásta Kristjánsdóttir og Auðunn Níelsson sem eiga heiður að myndunum.