Mælingar á dýpi í Landeyjahöfn fyrr í dag leiddu í ljós að aðstæður eru ekki nægilega góðar til siglinga. Því siglir Herjólfur áfram til Þorlákshafnar og fór hann seinni partinn í dag þangað samkvæmt áður útgefinni áætlun. Brottför frá Vestmannaeyjum er kl. 16:00 og brottför frá Þorlákshöfn kl. 19:45.

Ákvörðun um siglingar á morgun, sunnudag, verður tilkynnt síðar í kvöld eða í síðasta lagi kl. 06:00 í fyrramálið, segir í tilkynningu frá Herjólfi ohf.

Hér að neðan gefur að líta nýjustu dýptarmælinguna í Landeyjahöfn og eins og sést á myndinni kom sú mæling ekki nógu vel út – dýpið komið á milli garða niður í 2,3 metra þar sem grynnst er. Sanddæluskipið Álfsnes er komið til Eyja og er þess beðið að það haldi á svæðið til að hefja dýpkun.

Uppfært kl. 21.30

Herjólfur stefnir á að sigla eina ferð til Landeyjahafnar á flóði í fyrramálið. Brottför frá Vestmannaeyjum kl. 08:00 (Áður ferð kl. 07:00). Brottför frá Landeyjahöfn kl. 10:45.

Ef gera þarf breytingu á áætun verður það gefið út um leið og það liggur fyrir. Hvað varðar siglingar fyrir seinnipartinn verður gefin út tilkynning fyrir kl. 15:00 á morgun. Á þessum árstíma er alltaf hætta á færslu milli hafna og því ekki æskilegt að skilja eftir farartæki í annarri hvorri höfninni, segir í tilkynningu frá skipafélaginu, en Álfsnes er nú komið á svæðið.