Fulltrúaráð Sjálfstæðisfélaganna í Vestmannaeyjum samþykkti á fjölmennum fundi í gærkvöld að viðhafa prófkjör við röðun á framboðslista flokksins fyrir komandi sveitarstjórnarkosningar. Um 60 manns tóku þátt í ákvörðuninni.

Á fundinum var tekin ákvörðun um hvaða aðferð yrði notuð við röðun listans og varð niðurstaðan sú að fara sömu leið og í síðustu kosningum og halda prófkjör.

Næstu skref eru að skipa kjörnefnd og ákveða kjördag. Stjórn fulltrúaráðs fer með það hlutverk og hefur boðað til fundar 4. febrúar þar sem lögð verður fram tillaga að kjörnefnd og dagsetningu prófkjörs til samþykktar.

Gert er ráð fyrir að prófkjörið fari fram fyrri hluta marsmánaðar. Þar mun öllum sjálfstæðismönnum í Vestmannaeyjum gefast kostur á að bjóða sig fram og taka þátt í kosningunni. Endanleg tímasetning og tilhögun prófkjörsins verður auglýst síðar.

Í yfirlýsingu frá stjórn fulltrúaráðsins segir að prófkjör sé góð leið fyrir alla, unga sem aldna, sem hafa áhuga á bæjarmálum að taka þátt í mótun framboðsins. Allir áhugasamir eru hvattir til að taka þátt og leggja sitt af mörkum til að gera Vestmannaeyjar að enn betri bæ.