Kristrún Frostadóttir heldur opinn fund í Vigtinni bakhúsi

Samfylkingin hefur á síðustu vikum haldið 35 opna fundi um heilbrigðismál um land allt. Fundirnir eru opnir öllum og liður í nýju og umfangsmiklu málefnastarfi sem Kristrún Frostadóttir formaður flokksins hefur ýtt úr vör. Nú er komið að Eyjum.

Kristrún verður í Vestmannaeyjum miðvikudag 31. maí og býður til opins fundar um heilbrigðismál í Vigtinni bakhúsi kl. 17:00. Öllum er velkomið að mæta og taka þátt. Frekari upplýsingar á Facebook.

Fyrir opna fundinn mun Kristrún eiga fund með bæjarstjóra Vestmannaeyja og fara í heimsóknir á sjúkrahúsið og á hjúkrunarheimilið Hraunbúðir. Með henni verða fulltrúar úr stýrihópi Samfylkingar um heilbrigðisþjónustu og öldrunarmál.

Kristrún kemur til að hlusta

„Já, ég vildi að ÍBV hefði klárað leikinn á móti Haukum á mánudaginn! En fundurinn byrjar kl. 17:00 og leikurinn ekki fyrr en kl. 19:00 svo að fólk sem hefur áhuga getur þá kíkt við hjá okkur fyrst. Ég veit að heilbrigðismálin brenna svo sannarlega á Eyjamönnum,“ segir Kristrún í fréttatilkynningu.

„Ég er ekki að koma til þess að messa yfir fólki. Þvert á móti, þetta eru alvöru samtalsfundir og núna erum við bara að koma til að hlusta. Þannig fáum við skýrari mynd af því hvað það er í raun sem helst brennur á almenningi í þessum málaflokki. Svo hefur fagfólk líka mætt vel á fundina og þaðan fáum við mikilvæga innsýn sem mun nýtast í vinnunni sem er framundan,“ segir Kristrún sem hélt einnig opinn fund á Vigtinni síðasta haust í aðdraganda formannsframboðs.

„Ég hélt sjálf fjölda opinna funda um land allt á síðasta ári, meðal annars eftirminnilegan fund hér í Eyjum, og þeir fundir höfðu mikil áhrif á mig. Svona viljum við gera þetta og við tökum þessari vinnu alvarlega. Nú undirbúum við breytingar á sviði heilbrigðismála og það er ekki vanþörf á.“

Öllum velkomið að taka þátt

Kristrún leggur áherslu á að öllum sé velkomið að mæta á fundina og taka þátt. Ekki verði spurt um flokksskírteini fólks. „Nú erum við að opna flokkinn og leggjum áherslu á að taka samtal við fólkið í landinu. Ég bind miklar vonir við þessa vinnu,“ segir Kristrún sem bætir við að það sé strax farin að teiknast upp skýr mynd af af raunhæfum væntingum fólksins í landinu til heilbrigðisþjónustu.

Í auglýsingu fyrir fundinn segir meðal annars: „Ert þú með sérþekkingu í heilbrigðismálum eða reynslu af gólfinu? Eða ertu almennur borgari sem vill sjá breytingar til hins betra í heilbrigðismálum á Íslandi? Þá viljum við fá þig með í samtalið.“

Mynd: Kristrún í heimsókn á HSS í Reykjanesbæ.