Veðurstofa hefur gefið út gular viðvaranir fyrir sunnan- og vestanvert landið í dag. Búast má við éljagangi og suðvestan hvassviðri allt frá Breiðafirði austur fyrir Hornafjörð.

Suðvestanhríð brestur á um sunnan- og vestanvert landið í dag. Veðurstofa hefur gefið út gular viðvaranir sem taka gildi klukkan 9 fyrir Breiðafjarðarsvæðið, en klukkan 11 á Faxaflóa, Höfuðborgarsvæðinu, Suðurlandi og Suðausturlandi.

Búast má við éljagangi með skafrenningi og slæmu skyggni. Líklegt er að eitthvað verði um truflanir á samgöngum og tímabundnar lokanir á vegum.

Viðvaranirnar gilda fram til miðnættis.

Veðurspá gerir ráð fyrir suðvestan 15-23 m/s með éljum og kólnandi veðri í dag, hvassast suðvestantil.

Norðaustantil á landinu styttir hins vegar upp og birtir til er líður á daginn.

Frost verður á bilinu 0 til 6 stig í kvöld.

Heldur dregur úr vindi og éljum þegar líður á morgundaginn. Suðlæg átt upp á 5-10 m/s verður um norðvestanvert landið en suðvestan 10-18 m/s með suðurströndinni og austanlands.

Seint annað kvöld og aðfaranótt sunnudags snýst síðan í norðaustanátt og styttir þá að mestu upp sunnan heiða.