Undirritað hefur verið sameiginlegt verklag Vestmannaeyjabæjar, lögreglu og sýslumanns þegar kemur að málefnum barna en áhersla var lögð á vernd barna sem búið hafa við ofbeldi á heimili.

Um er að ræða afurð tilraunaverkefnis sem styrkt var af félagsmálaráðuneyti og dómsmálaráðuneyti eftir að aðgerðarteymi um aðgerðir gegn ofbeldi hafði tilnefnt verkefnið. Aðgerðarteymið skipa þær Sigríður Björk Guðjónsdóttir, ríkislögreglustjóri og Eygló Harðardóttir.

Síðasta haust var haldin vinnustofa í Vestmannaeyjum með fagaðilum úr hópi barnaverndar, félagsþjónustu, fulltrúa sýslumanna og lögreglu hvaðanæva af landinu en eftir vinnustofuna vann aðgerðarhópurinn í Eyjum úr niðurstöðunum sem snerust um hvernig þessar stofnanir geti unnið betur saman að úrvinnslu mála þessa viðkvæma hóps. Í aðgerðahópnum sátu þær Arndís Bára Ingimarsdóttir, aðstoðarsaksóknari, Guðrún Jónsdóttir, fyrrv. yfirfélagsráðgjafi, Silja Rós Guðjónsdóttir, yfirfélagsráðgjafi og Arndís Soffía Sigurðardóttir, sýslumaður.

Fjölmargir þættir eru innleiddir með verkefninu s.s. skilvirkari upplýsingamiðlun, fræðslumál, bætt þjónusta fyrir útlendinga, verkefnið samfélagslöggan, aðstoð fyrir gerendur, verkefnið Samvinna eftir skilnað svo fátt eitt sé nefnt.

Mikilvæg hliðarafurð tilraunaverkefnisins eru verklagsreglur sem öll skólastig í Eyjum hafa sett um tilkynningar um grun um ofbeldi og HSU hefur einnig sett sér slíkar verklagsreglur. Þá brugðust fiskvinnslur í Vestmannaeyjum afar vel við beiðni um að nálgast fólk af erlendum uppruna með upplýsingar um hvernig bregðast skuli við grun um að barn búi við ofbeldi. Fiskvinnslunar eru vinnustaðir fjölda fólks af erlendum uppruna en ekki er augljóst fyrir útlendinga hvert skuli leita við þessar aðstæður eða hvaða úrræði eru í boði. Líkt og skólar og sjúkrahús tóku fiskvinnslurnar höndum saman og útbjuggu metnaðarfullar verklagsreglur um hvernig bregðast skuli við ef upp kemur grunur á vinnustaðum um ofbeldi á heimili.

,,Heimilisofbeldi og ofbeldi gagnvart börnum er mein í hverju samfélagi og mikilvægt að þau kerfi sem er ætla að þjónusta þann hóp séu skilvirk. Markmiðið með þessu tilraunaverkefni er einmitt að bæta skilvirkni kerfa þannig að við getum beitt snemmtækri íhlutun í líf barna sem búið hafa við ofbeldi á heimili. Skilaboð okkar til allra þeirra sem hafa grun um að barn búi við ofbeldi er að tilkynna um það, ekki bíða og sjá til eða leggja mat á það sjálf. Ef það kemur upp grunur á hiklaust að hringja í 1-1-2 og tilkynna um grun, það er svo fagfólksins sem tekur við tilkynningunni að leggja mat á ástandið.” segir Arndís Soffía Sigurðardóttir, sýslumaður í Vestmannaeyjum, sem stýrði verkefninu.