Fjórtán gefa kost á sér í prófkjöri Sjálfstæðisflokksins fyrir sveitarstjórnarkosningarnar þann 16. maí nk. Prófkjörið verður föstudaginn 13. mars og stefnt er á að hefja  utankjörfundaratkvæðagreiðslu á morgun, þriðjudaginn 3. mars í Ásgarði. Hægt verður að kjósa milli 16:00 til 18:00 virka daga og kl. 13:00 til 15:00 um helgar.

Trausti Hjaltason opnaði kosningaskrifstofu í gær, en hann gefur kost á sér í fyrsta sætið í prófkjörinu. Skrifstofan er á efri hæð í gamla TM húsinu þar sem áður var skrifstofa Laxeyjar og Fiskistofu við Strandveg. Þar verður opið alla daga fram að prófkjöri.

„Það var góð mæting á opnunina og ég er bjartsýnn á árangur. Tíminn er fljótur að líða og eins gott að láta hendur standa fram úr ermum,“ segir Trausti sem teflir fram á mörgum vígstöðvum í baráttunni.