Síðastliðinn föstudag voru fyrstu heimaleikirnir hjá ÍBV í handboltanum. Kvöldið áður bauð handknattleiksdeild ÍBV handboltaáhugamönnum á leikmannakynningu í Akóges.

Eyjafréttir ræddu við þjálfara beggja liða um tímabilið. Sigurður Bragason, þjálfari kvennaliðsins segir aðspurður um hvernig tímabilið leggist í hann að það leggist bara mjög vel í hann. „Það er alltaf spenna að byrja nýtt tímabil.”

Nú eru töluverðar breytingar á leikmannahópnum frá í fyrra. Getur þú farið aðeins yfir þær?

Já, annað tímabilið í röð fara margar stelpur úr hópnum. Við missum 8 leikmenn en fáum eina. Það er vissulega ekki ákjósanlegt. Heilt byrjunarlið fer.  Þetta er nú bara veruleikinn við að þjálfa kvennalið hér. Þannig að ég verð að taka okkar ungu stelpur upp fyrr og setja þær í stórt hlutverk.

Er hann er inntur eftir svörum um hvaða lið hann sjái fyrir sér að verði í toppbaráttunni svarar hann: „Þetta er gamla lumman, Valur er með töluverða yfirburði í mannskap. Svo er þetta Haukar og Fram.”

Viltu koma einhverju á framfæri við stuðningsmenn liðsins?
Það er bara sama og öll hin árin, við erum mjög heppin með stuðning hér. Ég veit að það mun ekkert breytast, segir Sigurður Bragason.

Viðtalið við Magnús Stefánsson, þjálfara karlaliðs ÍBV birtist fljótlega hér á síðunni. Fleiri myndir frá leikmannakynningunni má sjá hér að neðan.