Aðalfundur kjördæmaráðs Sjálfstæðisflokksins í suðurkjördæmi var haldinn s.l. laugardag. Þar var tekin ákvörðun um að viðhafa prófkjör við val á framboðslista. Páll Magnússon sagðist sækjast eftir endurkjöri sem oddviti listans, Ásmundur Friðriksson tilkynnti að hann sæktist eftir öðru sæti. Vilhjálmur Árnason sem situr nú í þriðja sæti listans sagðist stefna hærra og þá tilkynnti um framboð sitt á fundinum Eva Björk Harðardóttir oddviti flokksins í Skaftárhreppi og hótelstýra Hótels Laka. Að sögn Jarls Sigurgeirssonar formanns fulltrúaráðs Sjálfstæðisfélaganna í Vestmannaeyjum var fundurinn vel sóttur og almennt mikill hugur í kjördæminu. „Hins vegar er ekkert launungamál að sú vantrauststillaga á Pál Magnússon sem fulltrúaráð Sjálfstæðisflokksins í Vestmannaeyjum lagði fram árið 2018 er enn í gildi og það er raunverulegt vandamál sem taka þarf á innan flokksins og hafa í huga í þessu prófkjöri sem framundan er. Það vekur sérstakar áhyggjur hjá mér hversu margir Sjálfstæðismenn lýsa yfir þungum áhyggjum af framboði Páls, þar sem fólk óttast áframhaldandi sundrungu og hefur ýmist sagst ekki geta stutt flokkinn, ekki geta unnið fyrir flokkinn eða hreinlega myndu yfirgefa flokkinn vegna þessa.“ Aðrir einstaklingar sem hafa verið nefndir á nafn sem hugsanlegir frambjóðendur eru Unnur Brá Konráðsdóttir fyrrverandi alþingismaður, Margrét Sanders bæjarfulltrúi í Reykjanesbæ, Guðbergur Reynisson eigandi Cargoflutninga ehf. í Reykjanesbæ og systurnar Guðrún og Aldís Hafsteinsdætur úr Hveragerði. Prófkjörið fer fram 29. maí nk. Frekari umfjöllun um aðra flokka og framboð er að finna í nýjasta tölublaði Eyjafrétta.
