Á föstudagskvöldið fóru fram í Höllinni góðgerðartónleikarnir Samferða. Ágætis mæting var á tónleikana sem þóttu vel heppnaðir.

„Virkilega vel heppnaðir góðgerðartónleikar, þar sem fjölbreytnin var í fyrirrúmi og einstaklega gaman að sjá t.d. hljómsveitina Merkúr, stíga sín fyrstu skref. Það sannaðist bersýnilega að Eyjamenn eiga mikið af hæfileikaríku tónlistar-og listafólki,” sagði Rútur Snorrason skippuleggjandi tónleikana í Eyjum.

Hann vildi skila kærum þökkum til allra sem gáfu vinnu sína og tóku þátt í tónleikunum. „Einnig ber að nefna annarsvegar Jón Helga Gíslason, sem hljóp í skarðið sem kynnir og hinsvegar þau Þórhall og Kittý sem gerðu slíkt hið sama vegna forfalla hjá Karlakór Vestmannaeyja. Þau stóðu sig öll frábærlega, sem og allir þeir sem stigu á svið. Þá vil ég einnig nota tækifærið og þakka öllum þeim gestum er lögðu leið sína í Höllina á föstudagskvöldið. Það hefur gríðarlega mikla þýðingu að svona viðburður sé vel sóttur.”

Þetta var í annað skiptið sem þessir tónleikar eru haldnir í Eyjum og er planið að halda þá árlega. „Samferða góðgerðarsamtök voru nú í annað skiptið á ferðinni með góðgerðartónleika og er markmiðið að gera þetta að árlegum viðburði um ókomin ár. Hver einasta króna sem safnast í kringum tónleikana verður skilin eftir í Eyjum og nú þegar erum við komin með 6 fjölskyldur og einstaklinga, sem eru að glíma við mikla erfiðleika og/eða langvarandi veikindi. Mér telst til að það hafi safnast yfir 300þús kr í þetta skiptið – með styrkjum og aðgangseyri á tónleikana.

„Að lokum vil ég þakka öllum þeim aðilum er komu að þessum viðburði – ekkert af þessu væri hægt án þeirra,” sagði Rútur að endingu og bætti við. „Samferða góðgerðarsamtök eru á Facebook og vil ég hvetja sem flesta til að læka við síðuna og þar er einnig allar helstu upplýsingar að finna.”