Minnkandi starfshlutfall og atvinnuleysi var til umræðu á fundi bæjarráðs í gær. Samkvæmt upplýsingum frá Vinnumálastofnun eru nú 107 einstaklingar í Vestmannaeyjum á atvinnuleysiskrá hjá stofnuninni í febrúar. Af þeim eru 26 einstaklingar sem hafa verið á atvinnuleysisskrá í meira en 12 mánuði. Það gefur ákveðnar vísbendingar um að stór hluti af skráðum einstaklingum er atvinnulaust til skemmri tíma. Af þessum 107 einstaklingum eru 38 einstaklingar í störfum í sjávarútvegi. Mörg dæmi eru um að sjómenn og starfsfólk í vinnslu skrái sig atvinnulaust milli vertíða. Ekki er hægt að sjá í upplýsingakerfum Vinnumálastofnunar hversu margir af umræddum 38 einstaklingum eru sjómenn eða starfsfólki í vinnslu, en það gæti skýrt hátt hlutfall atvinnuleysis nú.

Bæjarráð þakkaði upplýsingarnar og hvetur forstöðumenn stofnana Vestmannaeyjabæjar til þess að skoða möguleika á því að ráða einstaklinga í Vestmannaeyjum á atvinnuleysiskrá til starfa hjá bænum í gegnum úrræði hjá VIRK endurhæfingarsjóði.