Það er að færast fjör í leikinn fyrir komandi sveitarstjórnarkosningar þann 16. maí nk. Fjórtán frambjóðendur í prófkjöri Sjálfstæðismanna sem verða á föstudaginn kynntu sig á fjölmennum fundi í Ásgarði á laugardaginn. Áreiðanlegar heimildir herma að listi Eyjalistans sé nánast klár og verði kynntur á næstunni. Að honum standa Framsókn, Samfylking og Vinstri græn. Á meðan hefur lítið heyrst frá Miðflokknum eftir að hafa kynnt nokkrar konur og karla sem eru tilbúinn í slaginn í vor.

Kaffistofur bæjarins eiga það sameiginlegt að þar er ekki töluð vitleysan og mættu eyjafréttir.is í seinni bylgjuna í N1 við Friðarhöfn í morgun til að taka púlsinn á mönnum. Fyrri bylgjan er klukkan 9.30 en sú seinni kl. 10.30 og þar mæta menn með skoðanir.

Því fékk Jarl Sigurgeirsson, sem býður sig fram í prófkjöri Sjálfstæðisflokksins að kynnast. Hann fékk nokkrar spurningar sem hann svaraði af kurteisi en líka var rætt um gagn og nauðsynjar dagsins. Allt á þægilegu nótunum þó ekki séu menn alltaf sammála.