Gestir á Þjóðhátíð munu í ár hafa möguleika á að tjalda inni í Herjólfshöll, en greint var frá þessu inn á Vísi í dag.

Áður hefur þurft að hleypa tjaldgestum inn í Herjólfshöll í neyð þegar veður hefur verið slæmt, en í ár verður í fyrsta sinn boðið upp á að bóka tjaldstæði þar óháð veðri. Að sögn Ellerts Scheving Pálssonar, framkvæmdastjóra ÍBV er markmiðið með innandyra tjaldsvæðinu að bjóða gestum meiri þægindi, hvort sem veðrið verður gott eða óhagstætt.

Þetta er þó ekki í fyrsta skipti sem tjaldgestir fá að leita skjóls í Herjólfshöll. Í fyrra fengu gestir að færa tjöld sín inn í höllina þegar veður versnaði.

Fleiri breytingar verða á tjaldsvæðum, en tjaldstæði ÍBV færist af Þórsvelli yfir á Týsvöll og starfsemi Rent-a-Tent færist á Þórsvöll.

Forsala á Þjóðhátíð hófst um helgina.