- Eyjafréttir
- ·
- Áhugavert, Skipulagsmál
- ·
Umhverfis- og skipulagsráð Vestmannaeyja tók fyrir á síðasta fundi umsókn um byggingarleyfi á Búhamri 1, en áður hafði farið fram grenndarkynning. Það er fyrirtækið Skuggabyggð ehf. sem sótti um leyfi fyrir stækkun á íbúðarhúsi um 47,3 m².
Undirskriftarlisti frá ellefu nágrönnum barst ráðinu þar sem byggingaráformunum er mótmælt. Bréfritarar telja að viðbyggingin muni takmarka sjónlínur við gatnamótin og þannig draga úr umferðaröryggi.
Segja bygginguna skerða mjög sjónrými við gatnamótin
Í bréfinu segir m.a.:
„Við undirrituð sem hér ritum nöfn okkar á viljum mótmæla þeim áformum að leyft verði að byggja við húsið að Búhamri 1 eins og teikningar sem sendar voru í grenndarkynningu til íbúa við Búhamar.
Bendum við á innsendar athugasemdir hafa ekki verið teknar til greina að hálfu umhverfis- og skipulagsráðs Vestmannaeyja samkvæmt fundi 423 þann 16. júní 2025. Áskilin er réttur til að fara með málið lengra í kæruferil ef þörf er á.
Áformuð bygging er utan við tilgreindan byggingareit eins og öll húsin eru nú og með því að leyfa þetta þá er brotið á stíl og formi bygginga á svæðinu eins og það hefur verið byggt allt frá því að uppbygging svæðisins hófst árið 1975. Með þessu fordæmi eru opnaðar leiðir fyrir frekari breytingar sem ekki verður séð fyrir með þessu leyfi.
Fyrirhuguð bygging mun skerða mjög sjónrými við gatnamótin, og minnkar þar með sýn verulega. Með þessu skapast aukin hætta á slysahættu þar sem blind svæði myndast við gatnamótin.”
Að endingu segir í bréfinu að það sé krafa bréfritara að þessi áform verði dregin til baka í heild sinni.
Í samræmi við leiðbeiningar frá Vegagerðinni
Í niðurstöðu umhverfis- og skipulagsráðs segir að samkvæmt mati sem lá fyrir á fundi ráðsins við ákvörðun eru stöðvunarvegalengdir við gatnamótin í samræmi við leiðbeiningar frá Vegagerðinni. Gætt hefur verið að sjónlínum við gatnamótin með því að setja ákvæði í byggingarleyfi varðandi að háir garðveggir skuli ekki leyfðir og að geymsla lausamuna við austurhlið viðbyggingarinnar sé óheimil.
Áður hafði málið verið tekið fyrir á afgreiðslufundi byggingarfulltrúa þar sem málið var einnig samþykkt en með eftirfarandi texta:
„Gæta þarf vel að umferðaröryggi á horni við Búhamar 1, ekki er heimilt að hækka garðveggi og ekki heimilt að leggja ökutækjum á lóð framan við viðbyggingu vegna nálægðar við gatnamót. Niðurstaða afgreiðslufundar felur í sér samþykkt byggingaráforma í samræmi við 11. gr. laga um mannvirki nr. 160 / 2010. Óheimilt er að hefja framkvæmdir fyrr en byggingarfulltrúi hefur gefið út byggingarleyfi í samræmi við 13. gr. laga um mannvirki nr. 160 / 2010.”
Samkvæmt heimildum Eyjafrétta hefur málið nú verið kært til úrskurðarnefndar umhverfis og auðlindamála.
