Breki VE 61, togari Vinnslustöðvarinnar, landaði í Grundarfirði síðastliðinn mánudag. Aflinn var 550 kör, sem telst fullfermi, eftir sex daga veiðiferð. Breki var á Vestfjarðamiðum í blönduðum afla; þorski, gullkarfa, ýsu og ufsa, auk annarra tegunda. Aflinn fór í ýmsar áttir. Til Vestmannaeyja og Hafnarfjarðar í vinnslu, á ferskfiskmarkaði í Þýskalandi, Frakklandi og Bretlandi, auk þess sem hluti hans er seldur á fiskmarkaði innanlands.

Breki kom inn til löndunar klukkan 08:00 að morgni og hélt aftur til veiða eftir hádegi sama dag. Fiskurinn var kominn til vinnslu morguninn eftir og í skip á leið á ferskfiskmarkaði að kvöldi löndunardags.

Það þarf allt að ganga upp þegar jafn umfangsmikið verkefni og þessi löndun er framkvæmd á svo skömmum tíma. Allir þurfa að kunna vel til verka og vera á tánum. Ekkert vantaði upp á það hjá Fiskmarkaði Íslands og Djúpakletti, sem sáu um löndun, afgreiðslu skipsins og markaðssölu, né heldur hjá Ragnari og Ásgeiri, sem sáu um að koma fiskinum á áfangastaði.

Á facebooksíðu Vinnslustðvarinnar er birt myndband sem Leifur Harðarson tók upp og klippti saman af lönduninni og flutningunum frá Grundarfirði. Hér má sjá myndbandið.