Nú liggur fyrir að flottur hópur fólks býður fram krafta sína í þágu samfélagsins. Þverskurður bæjarbúa á breiðum aldri, með ólíka reynslu og fjölbreyttar skoðanir. Óska ég þeim öllum innilega til hamingju.

Sama hvernig Eyjamenn raða upp framboðslista Sjálfstæðisflokksins, í komandi prófkjöri, tel ég nær óumflýjanlegt að útkoman muni mynda sterka og samheldna forystu. Því þegar litið er yfir hópinn sýnist mér að sama með hvaða hætti frambjóðendur skipta með sér sætunum muni bæði reynsla og nýliðun einkenna listann.

Sjálfstæðisflokkurinn er fjöldahreyfing fólks og breiðfylking hugmynda. Þar eru allir velkomnir til þátttöku, þar sem í krafti fjöldans er unnið að sameiginlegri sýn. Hjá flokknum er víða virkt félagsstarf og ungliðahreyfingin sterk. Þetta er flokkur sem býr yfir mannauði sem lætur sér málefnin varða og höndum sem tilbúnar eru að leggjast á plóg. Þess vegna tekst Sjálfstæðisflokknum, nær einum flokka, að boða til prófkjörs víða um land og þess vegna finnst mér spennandi að taka þátt.

Ég held að prófkjör okkar muni leiða fólk saman, skapa jákvæða umræðu og vekja aukinn áhuga Eyjamanna á framtíð sveitarfélagsins. Ég vona að niðurstaða þess muni þó einna helst leiða af sér samstöðu meðal frambjóðenda. Ekki mun allt ganga eftir óskum allra en ég tel að þátttakan ein eigi að kalla fram stolt hjá frambjóðendum sem þori að stíga fram og bendla nafn sitt við pólitískt starf, samfélaginu til heilla.

Sjálf er ég nú í fyrsta sinn frambjóðandi og stolt af því. En hingað til hef ég ekki stigið út á svell stjórnmálanna. Helst sökum þess að lengi sinnti ég hlutlausu þjónustu- og stjórnendastarfi hjá Vestmannaeyjabæ. Þjónusta sveitarfélagsins þarf að vera bæjarbúum bæði aðgengileg og góð. Ég hef alla tíð lagt mig fram við að nálgast fólk af virðingu og eiga í samskiptum við alla á jafnræðisgrundvelli. Því er mikilvægt að hlusta og vera tilbúin til samtals og viðræðna en um leið reiðubúin að rökræða ólík sjónarmið. Þessi gildi mín munu ekki breytast þó hlutverk mitt verði hugsanlega annað en áður. Markmiðið er enn hið sama.

Ég vil óska öllum meðframbjóðendum mínum í komandi prófkjöri góðs gengis. Ég vona að við getum að kjöri loknu gengið saman öll sem heild, ásamt stuðningsfólki okkar og bæjarbúum öllum, til kosninga í vor. Þannig komumst við áfram.

Áfram Eyjar!

Rut Haraldsdóttir, óskar eftir 5. sæti.