Ákveðið hefur verið að setja eldri Herjólf í rekstur yfir Þjóðhátíðina. Ferjan mun sigla samhliða nýju ferjunni á föstudaginn og mánudaginn. Farin verður ein ferð hvorn dag. ÍBV mun annast sölu í ferjuna á vefsvæðinu dalurinn.is. – Miðar fyrir faratæki verða seldir á herjolfur.is og í síma 4812800.

Salan á miðunum hófst núna í morgun. Brottför á föstudaginn frá Landeyjahöfn er kl. 13:00 og brottför frá Vestmannaeyjum á mánudaginn er kl. 11:30.

„Það hefur verið markmið Herjólfs OHF að sinna samgöngum frá og til Vestmannaeyja eins best og mögulegt er á hverjum tíma. Þessi þjónustuaukning hefði ekki tekist nema með samstilltu átaki starfsmanna og áhafnar félagsins. Með þessari ráðstöfun er verið að bregðast við auknum þunga á samgöngukerfið milli lands og Eyja þessa daga,“ segir í tilkynningu frá félaginu.