Geir Jón Þórisson – Minningarorð við minnisvarða drukknaðra og hrapaða á Sjómannadegi:

„Ég vil óska öllum sjómönnum, fjölskyldum þeirra og öllum öðrum er mál mitt heyra, gleðilegan sjómannadag. Hér í Eyjum höfum við vanist því að gera þennan dag hátíðlegan og skemmtilegan og það skulum við ávallt hafa í heiðri,“ sagði Geir Jón Þórisson sem stýrði minnigarathöfn við minnisvarða um drukknaða og hrapaða að lokinni messu í Landakirkju á Sjómannadaginn. Lúðrasveitin lék nokkur lög, fánar stéttarfélaga sjómanna voru bornir að minnisvarðinn og hann var lagður blómakrans.

„Minning þeirra á alltaf að lifa enda færðu þeir miklar fórnir fyrir sitt byggðarlag. Hér á árum áður máttu margar fjölskyldur upplifa mikla sorg þegar pabbinn, afinn, sonurinn, bróðurinn eða einhver annar nátengdur komu ekki heim eftir sjóróðurinn eða úr úteyjum. Við minnumst þeirra allra á þessari stundu. Guð blessi minningu þeirra og alla afkomendur,“ sagði Geir og rakti þær miklu breytingar sem orðið hafa í björgunarbúnaði og að með stærri og öflugri skipum hefur slysum á sjó fækkað.

Björgunarafrek

„Það ásamt öflugri þjálfun sjómanna hefur orðið til þess að sjóslys eru sem betur fer mjög fátíð, fyrir það skulum við vera þakklát. Við megum vera afskaplega þakklát fyrir að eiga öfluga sveit björgunaraðila í Björgunarfélagi Vestmannaeyja. Hafa félagsmenn lagt á sig mikið erfiði við að endurnýja björgunarskip félagsins og annan búnað sem hefur svo sannarlega sannað gildi sitt. Síðast liðinn vetur unnu Björgunarfélagsmenn mikið afrek við mjög erfiðar aðstæður við björgun sjófarenda á skútu sem var illa farin og ósjófær skammt frá Eyjum. Nýja björghunarskip Björgunarfélagsins, Þór sannaði svo um munar hvað okkur er mikilvægt að búa yfir þessu góða og öfluga björgunarskipi.“

Geir Jón sagði að fyrir um 23 árum, eða 23. febrúar 2002 var síðasta mannskaða sjólys við Vestmannaeyjar þegar Bjarmi VE 66 sökk skyndilega vestur af  Þrídröngum með fjórum mönnum. Tveir björguðust sem má þakka Tilkynningarskyldu Landhelgisgæslunnar og áhöfnum varðskipsins Týs og þyrlu Gæslunnar  sem náði að bjarga tveimur mönnum. „Þetta sýnir okkur enn og aftur hvað vöktun skipa skiptir miklu máli sem öfllugt öryggisnet fyrir sjómenn okkar. Þá vil ég minnast á Slysavarnaskóla sjómanna sem heldur upp á 40 ára afmælið sitt í ár. Tilkoma þessa skóla hefur skipt sköpum og sannað gildi sitt fyrir okkar kæru sjómenn,“ sagði Geir og minntist á fólk frá hinum ýmsum þjóðlöndum sem hér starfar til sjós og lands.

Þökkum þá vernd sem hvílir yfir okkur

„Margt af þessu fólki hefur fest hér rætur og vill vera hér. Við erum heppin að hafa þetta góða fólk á meðal okkar þó svo að okkur kannski greini á um eitthvað svo sem trúarbrögð og ýmsar siðvenjur en höfum það ávallt í huga að góður Guð elskar okkur öll  hver svo sem við erum og vill að við sínum hvort öðru kærleika, vinskap og skilning.

Verkefnin á akri Guðs er uppskera, eða björgun verðmæta eins og sagt var hér í Eyjum þegar mikill afli barst á land og allir þurstu til starfa í gleði og eftirvæntingu. Verðmætin mestu eru þó fyrst og fremst lífið, vonin, umhyggjan, fyrirgefningin, miskunnsemin, kærleikurinn í heimi okkar.

Við skulum þakka fyrir þá vernd sem hvílir yfir okkur við oft mjög krefjandi og erfiðar aðstæður en við getum verið þakklát fyrir að yfir okkur vakir vernd Guðs, sem við höfum svo oft upplifað,“ sagði Geir Jón og óskaði sjómsjómönnum og öðrum sem á hlýddu farsældar og hamingju og Eyjasamfélaginu hagsældar.

„Mig langar að ljúka orðum mínum með kveðju sr. Jóhanns Hlíðar á Sjómannadeginum 1968. – Kæru sjómenn! Haldið fast í hina lifandi von, í starfi, í lífi og í dauða. Í lifandi von bið ég ykkur blessunar á þessum degi, sjómannadeginum og alla daga, hvert sem leiðir ykkar liggja og bið ykkur að varðveita þessa bæn í hjarta, hvernig sem blæs.

Blessuð von í brjósti mínu

bú þú meðan hér ég dvel,

lát mig sjá í ljósi þínu

ljómann dýrðar bak við hel.

Guð gefi ykkur gleðiríkan sjómannadag 2025 í Jesú nafni.“