Eldgos hófst upp úr klukkan 6 í morgun milli Sundhnúks og Stóra-Skógfells á Reykjanesi. Eldgosið sést vel frá Vestmannaeyjum líkt og meðfylgjandi myndir bera með sér.

Í tilkynningu Veðurstofunnar frá því snemma í morgun segir að klukkan 5:30 í morgun hafi hafist áköf smáskjálftavirkni norðaustan við Sýlingarfell. Um 30 mínútum síðar hófst eldgos á sömu slóðum. Fyrstu mínúturnar lengdist sprungan bæði til norðurs og suðurs.

Út frá fyrstu fréttum úr eftirlitsflugi Landhelgisgæslunnar er gosið á sömu slóðum og gaus 18. desember. Sprungan er um 3 km löng, liggur frá Sundhnúk í suðri til austurenda Stóra-Skógfells. Hraun rennur mestmegnis til vesturs á þessu stigi.