„Það er mikilvægt að fyrirtækin og stjórnvöld séu að ræða um sömu hlutina og vandað sé til verka. Þegar mesta hækkunin á auðlindagjöldum bitnar á fyrirtækjum í Vestmannaeyjum segir það sig sjálft að slíkt hefur áhrif og hefur í raun þegar haft það,“ segir Einar Sigurðsson stjórnarformaður Ísfélagsins hf. aðspurður hvers hann sakni í umræðunni um núverandi frumvarp um veiðigjöld. Einar er einn frummælenda á fundi sem Eyjafréttir standa fyrir í Akóges um veiðigjaldafrumvarp ríkisstjórnarinnar.

„Fyrirtækin draga úr fjárfestingum og minni áhugi er til fjárfestinga í framtíðinni. Það verður líka að vera hægt að treysta orðum forsætisráðherra og þingmanna í kjördæminu um að ekki verði farið af offorsi í breytingar og samráð verði haft. Það sést t.d. núna á röngum tölum um makríl að það var ekki gert. Það eru alveg tækifæri að laga slíkt og nálgast hlutina af skynsemi.“

Einar bætir því einnig við að eins og staðan er í dag borgar landvinnslan á Íslandi hæstu launin af þeim löndum sem við keppum við auk þess að skiptaprósenta á skipum er hæst á Atlantshafinu. Það sé ekki sjálfgefið að hægt sé að standa undir því ásamt öllu öðru.

Fundurinn er á morgun, fimmtudag í Akóges og hefst kl. 17.00.