Í gær færðu fulltrúar slysavarnarfélagsins Eykyndils veglegar gjafir til Skátafélagsins Faxa annars vegar og Björgunarfélags Vestmannaeyja hins vegar. Um er að ræða hjartastuðtæki. Gjafirnar voru afhentar við Vigtartorgið við upphaf dagskrár Þjóðhátíðardagsins.

Að sögn Sigríðar Gísladóttur hjá Eykindli verður tækið sem Skátafélagið Faxi fékk staðsett upp í skátaheimili, en þeir eru t.d. að leigja salinn fyrir veislur og fleira. Hjá Björgunarfélaginu verður það staðsett í bílnum hjá þeim. „Verðið er í kringum 400.000 kr. Öll tækin sem við höfum gefið eru eins og passa rafskautinn við tækið í sjúkrabílnum sem er kostur,” segir Sigríður.

Eyjafréttir heyrðu einnig í Frosta Gíslasyni hjá Skátafélaginu Faxa og vilja þau færa Eykyndli innilegustu þakkir fyrir þessa einstöku og dýrmætu gjöf sem þær afhentu félaginu, svokallað sjálfvirkt hjartastuðtæki (AED).

„Við leggjum mikla áherslu á öryggi í okkar starfsemi og með tilkomu hjartastuðtækisins getum við brugðist hraðar og betur við í neyðartilvikum, hvort sem er í skátaheimilinu, ferðum eða viðburðum. Þetta eykur ekki aðeins öryggi okkar félaga og gesta heldur einnig annarra í nærumhverfinu, þar sem tækið verður aðgengilegt. Við viljum þakka fyrir þá hlýju sem við finnum fyrir frá þessu öfluga slysavarnafélagi okkar í Eyjum, Eykyndli,” segir Frosti.