Ísfisktogararnir hafa verið að fiska ágætlega síðustu daga þrátt fyrir óhagstætt veður. Bergey VE kom til Vestmannaeyja í gær eftir tvo sólarhringa á veiðum með fullfermi og var aflinn mestmegnis ufsi. Heimasíðan hafði samband við Egil Guðna Guðnason skipstjóra á Vestmannaey VE í morgun og spurði tíðinda. „Við erum á landleið með fullan bát og mun túrinn taka tæplega þrjá sólarhringa höfn í höfn. Við erum mest með ufsa sem fékkst vestast á Selvogsbankanum. Fiskiríið hefur verið gott en veðrið hefur verið leiðinlegt. Núna er norðaustan 22. Í svona veðri reynir mikið á skip, búnað og áhöfn. Það er erfitt að vinna við þessar aðstæður, en það tekst,“ segir Egill Guðni.

svn.is