„Það er rétt, Steypey er að flytja þennan sand til Eyja gagngert til að nota í steypugerð.” segir Garðar Eyjólfsson, starfsmaður DVG í samtali við Eyjafréttir. Hann segir að þessi farmur komi úr bænum, rúmlega 3400 tonn.

„Aðalástæðan fyrir þessu er sú að sandurinn sem við höfum getað nýtt okkur til steypugerðar er sama sem búinn í Eyjum og til þess að lenda ekki í neinum vandræðum, þá sáum við okkur knúna til að flytja inn sand.

Þessi sandur er með mjög jafna kornadreifingu, alveg frá mjög mjög fínum sandefnum upp í aðeins grófari sand/steina og það er akkurat það sem verið er að leitast eftir þegar við búum til steypu svo steypan bindist rétt saman og verði nógu sterk m.v. þá forskrift af steypu sem óskað er eftir hverju sinni. Við reiknum með að  flytja inn umtalsvert meira magn af sandi á hverju ári m.v. óbreytta stöðu í sandmálum hér í Eyjum.” segir Garðar að endingu.

Halldór B. Halldórsson gerði sér ferð í Viðlagafjöru í morgun og má sjá myndband hans hér að neðan.